林鄭月娥新班子噚日開工咯，司局長精神奕奕背後，肯定戰戰兢兢，皆因新任女特首凡事親力親為，要求極高，唔打醒十二分精神都唔掂，尤其林鄭已落柯打，日後要做好政策游說，喺香港當前仲未修補好嘅撕裂氣氛下，未必係易事！
吖，唔知係咪有呢個要求，令到林鄭新班子成員中，有3名前新聞處處長聚首？因為佢哋掌管新聞處時，都係專責搞公關同新聞訊息發放！
聶德權同777合作無間
曾蔭權年代首屆替補特首任期倒數年零先上任嘅邱騰華，其實早喺煲呔第二個任期已經獲邀任局長掌環境局，新一屆掌管商務及經濟發展局；新任發展局局長黃偉綸做新聞處處長嘅任期，則橫跨煲呔同梁振英年代，2009年8月做到2014年頭後再轉去海事處，臨尾衝刺加入女特首班子做發展局局長。接黃偉綸任掌新聞處嘅聶德權呢，獲邀任局長真係唔意外，因為佢喺人口政策問題上，同林鄭都合作無間，新一屆就孭重任睇政制及內地事務局。
唔好忘記，連同董建華年代做過處長嘅蔡瑩璧，坊間盛傳煲呔曾經喺劉吳惠蘭請辭局長後打佢主意，最終佢雖然冇轉做問責官員，請咗政府食檸檬，但似乎做過新聞處處長，又真係特別易獲特首招手加入熱廚房喎？
有政務官都留意到呢個情況，笑笑口同八方講，做得處長就係未來局長大熱，密切注視現任處長黃智祖，5年後會唔會轉跑道出發？
李八方