阿士東維拉班主夏建統噚日喺twitter率先公佈，36歲嘅前車路士隊長泰利，周一正式加盟維拉。消息指泰利會同呢支英冠球隊簽署一張周薪60,000鎊（約61萬港元）嘅一年合約，連同獎金等在內，泰利嘅年薪總值會超過400萬鎊（約4,000萬港元），都算高薪啦。
中國老細率先爆料
36歲嘅泰利6月30日正式離開母會車路士，報道指佢獲得包括加拉塔沙雷、西布朗、史雲斯同般尼茅夫等眾多球會報價，亦有嚟自中超同埋美職聯嘅天文數字合約，可謂任君選擇。未想掛靴嘅泰利嘅最大原則，就係唔留喺英超倒戈效力咗20年嘅車仔，所以寧願降格踢英冠。
上個月泰利喺ig發佈一張同維拉領隊布魯士一齊打高爾夫球嘅相，睇嚟雙方關係一直都唔錯。長期活躍於twitter嘅維拉班主夏建統，6月30號已經出左條只得一個簽名emoji嘅tweet，當時英國傳媒已經估計維拉同泰利好事近，只係睇吓幾時公佈。而夏博士周一都係忍唔住，早過球會公佈呢個消息：「歡迎泰利嚟到伯明翰城…阿士東維拉！」
講番隊波，維拉喺2016年5月18號確定易手，中國商人夏建統入主成為老闆，據報價錢大約係7,600萬鎊（約7.7億港元）。2016/17球季，維拉由英超降落英冠後，迪馬堤奧獲聘為領隊，不過僅僅12場波後就被炒，改由前侯城領隊布魯士執教，而維拉最後亦都只得第13位。
維拉有唔少英超兵
維拉上周六已飛赴葡萄牙進行季前訓練營，預料泰利喺呢宗交易落實後，亦會向球隊報到。曾經78次入選英格蘭入六球嘅泰利有咩新隊友呢？前車路士嘅人就冇嘞，不過都有好多前英超兵，好似艾邦拉荷同米卡李察士咁。年輕啲而略有名氣嘅，首推「維拉周柏豪」基亞利殊啦，呢位仁兄14/15球季威過一輪後，近兩年最多都係爆出「吸笑氣」呢類醜聞，級數係點心照啦。