八方相當年：
鄭達鴻讀中學好Pure冇拍拖 - 李八方

朝朝返學旅程若風光如畫，唔開心就假，公民黨東區丹拿區議員鄭達鴻有親身體驗。中六因為要由鰂魚涌搭巴士去赤柱聖士提反返學，沿途見盡陽光與海灘，「好似去度假，感覺好舒服」，結果性情都變埋，由文靜變得外向兼vocal，但八方懷疑另有原因將佢改造，皆因呢位粉絲唔少嘅小鮮肉被問到有冇同學暗戀時坦承「都有啲」，雖然當時好清純冇拍拖，「有時都會同佢哋一齊搭巴士放學」。

讀大學為宿友起義

今年29歲嘅阿達同佢當選嘅區域情緣早結，由細到大幾乎住喺鰂魚涌同北角，中一至五讀張祝珊英文中學，整體嚟講係斯文，讀文科鍾意中史科，呢位波牛自詡唔係讀書天才，有時靠小聰明過關，會考15分而轉入聖士提反，佢話學校校風開放，都係令佢更vocal嘅原因！
高考成績麻麻，讀咗兩年HKU SPACE課程後先入理大讀社會政策及行政，入到大學終於有發圍機會，做咗宿生會主席為宿友謀合理權益，「當時有啲住hall規例搞到大家好似坐監，所以我哋就起義」，約見校方又貼大字報，最終成功爭取。
大學最後一年，佢同兩個宿友參加比賽，爭取到秘魯遊歷機會，過咗幾關最終喺60幾隊中脫穎而出。「大學時講過，玩完呢3年，出嚟做嘢要做到隻牛咁」，佢話估唔到應驗咗，2011年大學二年班到公民黨九西支部實習後與黨結緣，2015年喺東區丹拿區當選區議員，現為公民黨副秘書長。