官方喉舌新華社早前發佈一首「神曲」，rap住軟銷中國對港主權；原來7.1當日新華社再出招，上載一首廣東話歌《我的Hong Kong》，主唱者係愛國歌唱家張明敏同佢兒子張頌華，首歌比之前神曲更神，3分35秒嘅歌幾乎冇一個字「啱音」，如「一國兩制 港人治港 高度自治」聽落係「日角輛囝 貢人之貢 哥都GiGi」等。
有啲歌詞亦唔似廣東話一貫用詞，如「I believe 尊嚴富強的理想，I believe 家國情懷的分量，I believe 矢志不移渴望」。唔知全程「唔啱音」嘅風格，係咪配合林鄭嘅管治新風？唔少網民都話「好難聽」，音樂人周博賢就喺fb狠批：「初聽好笑，再聽好嬲！」不滿侮辱廣東話。
原來首歌原曲係普通話，由《快樂女聲》參賽選手路濱琪主唱，同一篇歌詞改用普通話去唱即時順耳返，新華社似乎太hea嘞！