林鄭月娥日前落區到中環荷李活道嘉年華，咁啱有「小鮮肉」自彈自唱英國樂隊Coldplay《Yellow》，林鄭未有聞「黃」色變，仲拍掌鼓勵。原來呢位小鮮肉叫羅啟聰，今年24歲，2012年參加FACE UStar校花校草選舉入咗校草5強，去年簽畀星娛樂做吳業坤師弟，計劃今年尾出碟。
「希望佢支持本地音樂」
3年前啟聰已經喺街頭演唱，一直喺銅鑼灣東角道唱歌，最近轉戰中環，對於撞正林鄭落區，羅啟聰同八方同事講：「啱啱唱完《Yellow》最尾嗰句，佢就行到嚟我度，嗰吓我呆咗唔知乜反應，呢首歌講達唔到夢想嘅遺憾，講真我都好開心見到特首，唱到歌畀佢聽，又同佢握手。」
佢話對政治唔係好有意見，關心社會但唔係好叻判斷對錯，每日一定睇新聞，覺得𠵱家嘅年輕人比較迷茫同沮喪，「希望呢個特首可以畀到我哋新希望，同埋希望佢可以買我嘅唱片，支持本地新人同音樂行業，香港音樂越嚟越灰，好多人唔聽廣東歌轉聽韓國歌」，冀林鄭支持多啲文化藝術。