債券通噚日開波，晨早有超過500名嘉賓逼爆交易大堂，但比起滬港通、深港通，場面算係幾鬆動，大家可以唞到氣。
唔好以為債券通淨係得一味咁少，事實係有3場「開通儀式」㗎，由主場港交所（388）行政總裁李小加、外滙交易中心副總裁張漪做客串主持。
頭一場係二級市場「北向」債券通開通，由人行副行長潘功勝、金管局總裁陳德霖大力敲鑼，敲足三次，順順利利咁話。
第二場就係一級市場發債，有7家銀行好捧場，除咗一班中字頭銀行同國企之外，仲有馬來西亞銀行。呢場開通儀式有啲似慈善機構籌款晚會咁，由咁多位老總圍圈、掂住一個黑色「魔術球」，宣佈開通一刻就有祝賀字句，好似走馬燈咁轉啊轉啊，但係有少少技術問題，遲咗幾秒先顯示到字幕，小加都話個Magic ball唔聽話呀！
去到第三場，係「債券通公司」揭幕儀式，呢次比較傳統，拉一小塊紅布簾，象徵式咁慶祝吓，事關債券通公司早喺6月初由港交所、外滙交易中心成立。