幾個歐巴桑講起美容療程出事，似乎天意要市民舉一反三，認清真騙徒，攞命一次就夠，唔會攞住先。
「在美食博覽會九唔搭八搵老襯，落足嘴頭，講到天花龍鳳，你話，似唔似叫你袋住先。」夾起燒賣的大叔接口：「個sale屎直情奶媽上身，做人辦，see，睇我打完神針，幾打得！每日處理三呎厚的folder文件一樣咁醒！唔似得那個hea做的，辦公枱一張紙都無，佢識得搞公關當然唔使打針啦。我這種實幹型，要求咁高，一定要搵要求更高的神針打救！」
支針神到天堂都唔收住，要佢領導熱廚房五年，做一姐，係打工仔都心動啊。於是從教師到清潔女工，信了！碌卡時保證，將來她的團隊，肯定做實事而不是做柒事，唔理好醜，只要咪挑戰習帝，緊跟一帶一路，包靚！唔去諗銅鑼灣書店，歡迎西九故宮加建做豪宅，開放懷抱等內地黑錢湧來洗白白，香港人唔使谷氣，打支針順番晒。噢喔……乜出咗事？咁我唔評論個別事件！一國兩制係成功的實驗，存在優化空間。幾時重啟政改神針方案？哎，我雙腳好麻好重，係咁先。