剛周六是28歲本地騎師梁家俊的運滯日，第四場策「華麗再現」搏輸屈居亞軍；第五場他騎「勁飛寶寶」跑梗頸四之後，家俊仔更因不適退下火線；結果第七場「恆駿寶駒」臨時換柏寶操刀建功捧盃；而第十場他的私家馬「財高八斗」早在排位時換李寶利，亦贏馬而回，冇家俊仔份。
梁家俊的身體狀況，原來比想像嚴重，更隨即已做手術。他手術後接受訪問，家俊仔憶述第五場「勁飛寶寶」自己沿途都冇乜嘢唔妥，但解完鞍逐漸肚、腸痛得非常緊要，行都行唔到，平攤在騎師室內地上，經過駐場醫生初步檢查後，須即送威爾斯親王醫院，發現疑似有腸套疊問題，要立刻做手術，而此種病癥多見於嬰兒，出現在成年人身上十分罕見。
梁家俊話暫時唔知幾時會完全好返，但今季內應該唔會上陣，對於「告東尼獎」，佢話唔會因為想爭呢個獎而強行復出，呢個時間最緊要健康行先，之後會再搵醫生覆診。
目前梁家俊以25Win領先23Win的巫顯東，季內只餘下3戰，巫顯東7月12及16日煞科日須停賽，而家俊仔已提早唞暑，換言之東東下期日馬(9日)若中三元，便可獲「告東尼獎」。
另一方面，梁家俊太太阿Kit，在社交網站發放家俊仔圖片，並寫上：「手術過後，鐵人爸爸要休息了，謝謝你為這個家打拼。我和寶寶以你為榮。」究竟「寶寶」是誰？家俊仔又幾時變了鐵人「爸爸」，莫非阿Kit有所暗示？