林鄭新班子登場，梁粉都要執包袱走人。好似日薪一萬嘅前新聞統籌專員馮煒光（圖），7.1後當然冇得留低，但佢都好知碇，一卸任就出發去北韓，唔知係咪怕7.1後留港會黯然神傷？
馮煒光噚日喺fb發文，話已經出發前往北韓，會有4日唔能夠上網。
從佢上載嘅相片可見，佢搭緊火車噃，佢又展示北韓發出嘅證件，以及由丹東出發往平壤嘅火車相片，留言話4日不能上網，耳根清靜一下，但佢都仲好有自信，喺橋邊影嘅相寫道：「雄糾糾（赳），氣昂昂，跨過快出發了！」
有網民喺帖文下留言，質疑：「有特權？點解上到facebook㗎？」又有市民擔心佢安全，「去北韓？怕唔怕危險嗎？」同屬梁粉嘅專欄作家屈穎妍亦溫馨提醒前「白宮發言人」，叫佢「唔好搣傳單啊！」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk