家陣同後生仔講玩fb，其實已經out到一個點㗎喇，好多人都已經轉戰ig，包括上季外借艾拉維斯嘅皇家馬德里中場馬高斯洛蘭迪（右圖右），同埋AC米蘭守將阿歷斯奧羅馬洛尼。不過，佢哋喺上周五竟然約埋宣揚真主偉大，仲直播騎呢阿拉伯文短片（左圖）！原來佢哋都疑似俾一位伊拉克駭客Mahmood Jumaa入侵賬戶，搞到無啦啦變咗打手。羅馬洛尼事後喺社交網站同球迷道歉，澄清之前上載嘅內容唔關佢事，至於洛蘭迪就仲笑得出，喺ig上載自己隻愛犬個囧樣，話呢個就係佢見到ig被hack嗰陣嘅表情，亦表示事情已經解決。