香港人越嚟越難買到樓，所以有樓收租係唔少人嘅夢想，不過揀租客就一定要好小心，如果唔係，隨時好似已退休嘅英格蘭中場林柏特咁；林伯間出租倫敦靚屋，由豪宅變到畀人「撳鐘仔」，真陰功！
據英國《太陽報》報道，林伯將佢喺倫敦價值200萬鎊嘅豪宅，喺舊年以每個月3,400鎊，租咗畀一名自稱係健身教練嘅37歲女人達雲娜。點知，原來達雲娜係另類健身教練，服務包括喺屋入面同客人玩SM，綁起客人鞭打，仲玩埋角色扮演，佢做惡毒女miss，客人就扮學生；每小時收費400鎊（約4,000港元），額外畀多100鎊嘅話，仲可以拍埋片㖭！
達雲娜喺網上大賣廣告，話自己叫「多面女郎史黛茜」，又話自己係「全倫敦最性感、淫穢兼狂野嘅女郎」，而且好歡迎大家去佢嘅「地牢」探佢喎。
提供性玩具、可卡因
齋講冇用，英國《太陽報》記者就「放蛇」睇吓達雲娜究竟係點樣「健身」。原來，佢喺林伯間屋放咗好多健身獎盃，仲有大量「生財工具」，最重要係好開放，唔介意喺記者面前數錢。講到間屋，達雲娜話：「我好鍾意𠵱家呢間屋，特別係有個有蓋花園，真係好啱我。」
佢仲暗示，只要客人出得起錢，仲可以提供埋可卡因：「我有啲藥喺手，不過唔會賣畀客人，因為如果係咁，我就變成毒販，但係，我唔介意客人因為咁而畀多啲貼士我囉。」
林柏特蒙在鼓裏
39歲嘅林伯同太太碧琪莉就住喺達雲娜間屋附近，但佢哋就對達雲娜嘅嘢完全唔知情。林伯發言人指：「林柏特有唔少物業，而且全部交畀物業公司管理，對於今次事件，我哋會好好調查。」
至於一名唔願透露姓名嘅林伯朋友就話：「林柏特完全唔知道呢件事，知道後佢都好震驚，而且會盡快處理事件。」
妓女曾攻陷奧脫福
喺林柏特間出租豪宅變淫窟之前，其實曼聯名宿傑斯同埋加利尼維利，亦都試過中招；佢哋間四星級酒店Hotel Football，由於鄰近曼聯奧脫福球場，人流旺兼多麻甩佬，所以喺舊年就俾一個網上賣淫集團，租咗嚟做生意，旗下一個叫Kat Lee（圖）嘅妓女仲向英國《太陽報》爆料，有唔少紅魔職員喺度幫襯㖭。
