由新世界（017）副主席鄭志剛（Adrian）打骰嘅尖沙咀K11，前日開始引入咗韓式牛奶雪糕店「百味堂」Pop-up store（期間限定店），為期3個月。雖然只係開咗短短兩日，但Facebook專頁話單係噚日，就總共有成過千人排隊，場面墟冚。據了解，雖然依家K11出租率達100%，但一向鍾意引入特色店舖嘅K11，都有意將Pop-up store轉成實體店。
查實今次並唔係K11第一次引入Pop-up store，之前都有試過同精品咖啡店「Liger x Elephant Grounds」、港女最鍾意嘅馬卡龍品牌「Pierre Herme」等搞Pop-up活動，不過搞完活動之後都冇咗下文，如果今次百味堂同K11傾得掂數，一定吸引到唔少人流。
百味堂來頭唔細，本身係一間有53年歷史嘅牛奶公司，兩年前先開設甜品品牌，宜家喺韓國已經有成60幾間分店。至於點解咁出名呢？就係因為所用嘅係有機奶，而今次喺K11擺嘅pop up store就有雪糕、飲品等，一杯皇牌原味牛奶雪糕就要48蚊，貴唔貴就見仁見智喇。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk