新任特首林鄭月娥稱要有管治新風格，銳意改善行政立法關係，上任首周已殺入立會，周三出席答問大會接受議員質詢。其實林鄭嘅加強溝通新猷，點只呢樣？立法會都傾緊周三例會係咪加入質詢特首環節，行會新貴張國鈞噚日證實係林鄭本人提出，希望每月去立法會一至兩次回應議員關注問題。花生友聽各黨派齊表歡迎之時，唔少政務官牙痛咁聲。
點解AO唉唉聲？事出當然有因！政策每逢出台前，政策局都會約見議員做諮詢、摸底、游說工作，但如果議員可以每星期直接同特首對話，擔心以後莫講話公務員，連司局長搵議員游說，對方都會請大家食檸檬，有大梗係食大，「肯定乜都留番同林鄭講」，日後工作變相更困難；對林鄭亦未必好，因為事事都係佢自己應承孭咗上身，若然有乜差池，想搵人幫手頂吓都未必得，長遠對佢嚟講都係一場消耗戰。
管得太細 下屬多掣肘
有資深公務員就話，林鄭好聽啲就叫「好打得」，但其實管得太細，令下屬冇乜空間，都好閉翳㗎，相比之下，前財政司司長曾俊華就善於分配工作，按項目重要性要求唔同職級嘅官員出面處理，佢本人就甚少親自出馬，當然啦，有人會覺得咁樣係hea住做嘅。
話說回來，特首以往一般每年去立會4次接受議員質詢，家陣議事規則委員會討論緊，特首可按其意願，每月出席立會大會一至兩次，接受約30分鐘質詢。張國鈞話𠵱家喺立會會議口頭質詢有預告期，好多時輪到議員提問時，有關議題已經過氣，若然有咁嘅安排，可以令特首更快、更直接回應熱門議題。
花生友
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk