喺特首梁振英卸任前趕上尾班車，獲頒授大紫荊勳章嘅「梁粉」瑞安集團主席羅康瑞，係最早撐CY嘅政商界中人，佢噚日接受電台訪問表明無悔當初支持對方參選，認為佢有心有能力，一心一意為港做事，好佩服佢；至於梁振英係咪好好嘅政治活動者，以及政治技巧方面嘅問題呢，佢相信大家心中有數。
上海姑爺話呀，梁在任時受到好多抨擊，但從來冇聽過對方吐苦水，即使宣佈唔連任約佢見面，亦只係關心自己餘下任期可以為香港做啲乜。繼續力撐梁振英為港做咗好多嘢，例如改善咗房屋問題，但香港政治氣氛往往令佢好多嘢都做唔到，相信歷史會給予對方評價。
佢同時話呀，𠵱家嘅樓價係高到唔合理，有發展商推出150呎嘅單位係「非人道」，比住喺監獄更慘，唔知林鄭對此有冇解決辦法？
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk