許鞍華（Ann）執導新作《明月幾時有》，搵嚟周迅、葉德嫻、彭于晏同王菀之主演，以日本侵華嘅「東江縱隊生死營救」事件，講述香港傳奇女性「方姑」（周迅飾演）為代表嘅仁人志士，喺1940年亂世中嘅生死救援故事。Ann話好難得拍到香港歷史：「我70歲，拍得一套得一套，盡量搵晒自己鍾意嘅演員合作。」Ann感激一班演員傾力嘅演出：「其實今次周迅、葉德嫻同王菀之嘅角色好難做，佢哋都係高手先至做到。」
挑戰嫩口村姑
王菀之戲中扮演村姑，佢話只能用「緊張」兩個字嚟形容演出心情：「好複雜，未拍前複雜過拍緊嘅時候，知道係許鞍華導演已經好興奮，但又唔可以掛住自己係一個影迷，而唔記得演戲，好驚自己做得唔好，我係拍喜劇較多，知道今次有歷史背景兼真人真事，我識嘢又唔多，好似一張白紙，只能信任大家教導我點做。」
今次最大挑戰王菀之覺得係角色年齡比自己細20年，好彩嘅係可以望住葉德嫻同周迅去演，佢話：「只要望住佢哋雙眼，已經可以帶動到我嘅情緒。希望經今次之後令自己有所成長，我好驚自己做得唔好，呢個班底實在太專業太叻，原來我之前擔心同冇信心係唔使驚，入到去大家就令到你知道點做，由驚變咗享受。」
撰文：馮仁昭