巴塞隆拿球星美斯周五同女友安東莉娜喺阿根廷家鄉羅沙里奧舉行婚禮，邀請咗大約260位賓客出席，當中唔少都係美斯嘅新舊阿根廷同巴塞隊友。既然今會場今次佈置一個猶如頒獎禮嘅紅地氈場景，一眾球星WAGS又點會錯過爭妍鬥麗嘅機會，其中沙維、佩奧爾同法比加斯齊齊攜眷出席，法比仔另一半Daniella Semaan向來身材火辣，今次都以一襲低胸裝示人搶晒鏡，風頭稍稍壓過佩奧爾女友Vanessa Lorenzo同沙維妻子Nuria Cunillera咁啦。婚禮完結後，其餘WAGS亦陸續現身，可謂花多眼亂。
不過，眾多WAGS之中最受注目嘅應該係碧基嘅歌手女友Shakira，皆因早前有指佢因為撬安東莉娜閨蜜、即係碧基「前度」牆腳而令兩人決裂，或者唔會出席今次婚禮。雖然紅地氈未見佢蹤影，但有網上流傳圖片顯示佢同碧基都有到場祝賀，一場喜事冇咁小器嘅！