「No-Look-Pass」、後腳「通坑渠」乜都出齊，巴西一代球王朗拿甸奴三十有七依然大把貨！上周五喺魯營上演巴塞傳奇隊對曼聯傳奇隊「首回合」對壘，作客嘅曼聯靠布隆基斯、普波斯基同約基各入一粒贏3:1，但「細哨」賣力演出加上主場球迷「偏幫」下，依然當選賽事最有價值球員！
雙方今場為巴塞一間癌症治療中心籌募經費，陣容亦可謂誠意十足，巴塞有細哨、李華度、戴維斯、古華特等壓陣；曼聯方面亦有約基、朴智星、沙夏等。紅魔14分鐘先憑瑞典快翼布隆基斯門前混戰射入領先，57分鐘更憑捷克翼鋒普波斯基撞射入網贏到兩粒。
其實巴塞攻勢猶勝對手，但球員態度較具玩味，包括李華度接應細哨直線傳送後腳射門僅告斜出，反觀曼聯攻門直接得多，77分鐘靠約基禁區外燙射擦柱入領先3:0，巴塞最終靠守將迪侯中路突破冷靜破蛋追至1:3完場，雙方9月2號會喺奧脫福再次交鋒。
