草蜢成員蘇志威入錯貨？蘇志威以7位數購入，由鄭俊偉訓練的4歲馬「駿王」上仗在港初出角逐三班泥地1200米，一直沿途居後毫無走勢，結果大包尾跑得第12名，輸一條街27.75馬位，未能取得分文獎金。
「駿王」今日第二次在港上陣，加程出爭第八場三班泥地一哩粵港盃，再配杜利萊，是57倍大冷門，結果表現仲衰過上次，早段守五、六位，中段起已墮退，轉彎更大波勾外閃，最終又包尾，更輸遠至48.75馬位，賽後蘇志威立即趕落去馬匹解鞍處，視察「駿王」，但睇完後就話愛駒健康冇事。
至於呢頭頭馬，由巫顯東同何良組合「都靈明珠」勝出，這對華人騎練在第三場已贏「開心美麗」，結果第八場他們再下一城，聯手起孖兼贏粵港盃。「都靈明珠」連續兩場做二奶後終於坐正，季內第二度勝出，今場單Win及組合獨贏A2分別派37及19.5元。
23歲見習騎師巫顯東今季頭馬更增至23場，現僅落後師兄梁家俊兩Win，在「告東尼獎」後來居上封王的機會進一步加大。
第八場由三匹熱門「都靈明珠」、「摩高一丈」及「豈等閒」順序跑入三甲，第四名是臨時由梁家俊換田泰安的冷馬「君悅灣」，四重彩派9,246元。另外，「勢必跑」臨場位置曾受巨額過關影響變熱門，最終只跑第七，馬迷跟風落注難免輸錢。