美斯做老襯嘞！呢位30歲阿根廷球王上周五喺家鄉羅沙里奧同拍拖九年嘅青梅竹馬女友安東莉娜（Antonella Roccuzzo）舉行盛大婚禮，兩人喺阿根廷歌手Abel Pintos現場哼出戀曲下，以情深一吻訂下婚盟，大囝Thiago亦喺旁邊見證，賓客頓時報以熱烈掌聲！
呢場盛事被阿根廷傳媒譽為「世紀婚禮」，約260人嘅賓客名單當然星光熠熠，單係新舊巴塞同阿根廷隊友嘅名單已經「水蛇春」咁長，尼馬、蘇亞雷斯、碧基、布斯基斯、沙維、迪馬利亞、希古恩、阿古路、拿維斯、馬斯真蘭奴、佩奧爾、伊度奧、法比加斯等都係座上客！
球星WAGs爭妍鬥麗
美斯同美斯嫂之後結伴步出排場猶如各大頒獎禮嘅紅地氈區，接受賓客同獲邀嘅150位傳媒朋友祝賀，兩人喺眾目睽睽下情難自禁再度熱吻。 場面咁盛大，一眾球星WAGs又點會錯過爭妍鬥麗嘅機會，其中法比加斯帶埋另一半丹莉娜（Daniella Semaan）出席，丹莉娜向來身材火辣，今次都以一襲黑色低胸裝仲要露背示人，風頭稍稍壓過佩奧爾女友Vanessa Lorenzo同沙維妻子Núria Cunillera咁啦！
Shakira現身碎不和傳聞
不過，眾多WAGs之中最受注目嘅應該係碧基嘅歌手女友Shakira，皆因以往有指佢因為撬安東莉娜閨蜜、即係碧基「前度」牆腳而令兩人決裂，唔會出席今次婚禮。雖然紅地氈未見佢蹤影，但有網上流傳圖片顯示佢同碧基都有到場祝賀。
講番主角，美斯雖然開始同安東莉娜拍拖時係21歲，不過佢哋其實由細識到大，有指美斯孩童時期已經睇中作為朋友表妹嘅安東莉娜，但太怕醜唔敢去馬，經常借啲意探朋友而去見心上人。
嚟婚宴嘅賓客唔使畀人情，鍾意嘅話歡迎捐錢畀美斯嘅基金會，而每位賓客都會收到一份精美嘅禮盒，入面有枝紅酒同開瓶器，仲有美斯鍾意食嘅牛奶糖醬。