所謂好波不如好運，你睇澳洲騎師柏寶今日（1日）於沙田馬場的際遇就知。佢在第七場二班1400米臨危受命，代替臨時身體不適的華將梁家俊，策騎蘇偉賢馬房「恆駿寶駒」，結果留前鬥後一攻而破，個人捧走香港回歸盃之餘，更與蘇偉賢攜手起孖，「恆駿寶駒」更刷新沙田1400米全港紀錄時間。
五歲二班馬「恆駿寶駒」季內第三次贏馬，今場單Win及組合獨贏A2分別派150及27.5元。
早於這天頭場四班田草1200米，柏寶已為蘇偉賢初出馬「印印腳」大熱取勝，加上今場「恆駿寶駒」爆冷得手，呢個練騎組合炮製出一條自製45倍獨贏過關，可謂盡領風騷。「恆駿寶駒」沿途居中前位置，直路加速輕勝2.25馬位，跑出1分20秒31，打破了10年前2007年4月22日「零用錢」的1分20秒4舊紀錄，刷新沙田1400米全港紀錄時間。
季內勝出最多頭馬的本地騎師，將自動成為「告東尼獎」得主，梁家俊今日搏輸第四場「華麗再現」做阿二，加埋呢場因身體不適騎唔到「恆駿寶駒」，變相可以話冇咗兩Win，相反在「告東尼獎」暫排第二的巫顯東，在第三場贏「開心美麗」，追到22比25Win，只落後梁家俊三Win，你都咪話巫顯東冇機會後來居上封王。
第七場二至四名分別為「綫路勇駒」、「蒙古王」及「川河寶駒」，四重彩派11萬。呢三駒都係啡燈或綠燈落飛馬，最終俾冷門「恆駿寶駒」一網成擒。