趣趣地：
德國炒老墨決賽鬥智利

周四洲際盃四強，德國以4:1大勝墨西哥，下周日會同智利爭冠！雖然德國今次未有召紐亞同奧斯爾等主力，分組賽亦冇咩霸氣，但一眾新星嚟到淘汰賽就展現日耳曼本色，六分鐘就憑哥列斯卡策動反擊，再接應軒歷治斯傳中撞射破網領先1:0；呢位史浩克中場兩分鐘後再接應迪姆華拿直線，快墨西哥門神奧祖亞一步射入，德國半場領先2:0。

換邊後德國再憑小組入滲撕破老墨防線，59分鐘祖拿斯赫達接應達斯拿直線，前者再造就華拿撞入空門。雖然墨西哥89分鐘憑馬哥法比安破蛋，但德國補時再靠艾文尤尼斯埋齋射成4:1完場，殺入決賽同智利爭冠軍，兩隊曾經喺分組賽打成1:1平手，實力旗鼓相當㗎。