噚日係國家主席習近平夫人彭麗媛訪港第二日，朝早喺梁唐青儀陪同下，到訪黃竹坑一間安老院。彭麗媛身穿黑色連身裙，腰繫啡色腰帶，腳踏深色高跟鞋，都幾高貴優雅，而前日衣着俾人彈到升天嘅龍蝦，就抄彭麗媛前日落機時嘅素淡套裝。不過都係失手，仲累埋彭姨俾網民笑佢哋兩個一黑一白，好似黑白無常咁探老人家，大吉利是喎！
政府新聞處就話，彭麗媛係去安老院同一眾老友記傾談及製作立體卡，仲獲兩位長者代表送贈手繪畫作，而佢就向中心致送一部智能健康一體機和一部電視機。彭姨就繼續做親善大使，喺車內同離開安老院時都有向傳媒微笑同揮手，但傳媒其實係冇得入去採訪，佢架專車仲直入安老院，落車位距離記者採訪區成20米，有記者高聲提問都唔知佢聽唔聽到。
愛國旗手被勸退
雖然彭麗媛只喺安老院逗留咗大約半個鐘就離開，但係佢到訪期間，警方梗係加強附近保安，連對面居屋南濤閣高位都有警員駐守，亦曾封閉附近南朗山道，其間有市民打算經過都被持長槍警員阻止。保安咁嚴密，都係冇阻愛國熱情嘅！喺彭到場前個幾鐘，一架旅遊巴載住一班頭戴紅帽、手執國旗嘅叔叔嬸嬸到場，估計係打算歡迎習夫人來臨，但慘被警方即時勸離，白行一趟，好慘。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk