特首梁振英噚日公佈任內最後一份授勳名單，結果名單一出就罵聲四起，除咗佢手下「四大家臣」邵善波、張志剛、劉炳章及高靜芝全部有金紫荊外，連梁御用網上打手、《港人講地》總編輯張瑞蓮都有個太平紳士做「安慰獎」，反而行政會議召集人林煥光就乜都冇，唔少官場同政圈中人都戥佢唔抵。
其實林煥光2000年已有個金紫荊勳章，不過自回歸以來由「大Sir」鍾士元到梁振英，甚至只做召集人不足8個月嘅夏佳理，都有大紫荊勳章，有政界中人話，按一貫傳統，梁特任前畀個大紫荊林煥光完全合情合理。
官場戥林煥光唔抵
但梁情願向「梁粉」金主派大紫荊，都唔畀林煥光，難免令人相信，之前傳梁好唔妥林煥光非空穴來風！
如果話林煥光冇大紫荊好唔抵，有官場中人講笑話，今次授勳名單最抵嗰兩個人，就非發展局局長馬紹祥，同埋勞工及福利局局長蕭偉強莫屬。
其實佢兩個今年2月先升正做局長，其間固然冇乜大風大浪，甚至連上立法會都冇乜俾議員質，佢兩個可以𢭃半年局長人工，收多幾十萬之餘，仲攞埋金紫荊，真係比好多喺立會捱足5年議員批評嘅局長抵好多。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk