梁振英今日就離任特首，早排八方寫過佢開始裝修位於山頂貝璐道裕熙園嘅獨立屋，不過噚日係689喺禮賓府嘅最後一日，因為要招待訪港嘅國家主席習近平，似乎冇時間親自搬屋，要交由禮賓府員工代勞，唔少網民為梁離任贈興，唔止想梁搬出禮賓府，仲想佢快快搬埋返大陸。
11：40pm正式遷出
八方聽聞689其實搬屋已七七八八，今日就會搬返山頂大宅住。《蘋果》記者噚日下晝5點幾，見到689夫婦坐車離開禮賓府，梁特坐後座，神情都幾嚴肅，梁唐青儀就向記者展露微笑，到傍晚近6點幾，就見到有架掛住AM車牌嘅客貨車進入禮賓府，多名職員火速喺屋內搬出一箱又一箱物品上車，大約20分鐘後，又再有一架車駛入禮賓府，職員再將一堆物品搬上車，之後兩架客貨車就駛返梁振英山頂貝璐道大宅。噚晚11點40分，梁氏一家正式遷出禮賓府。
雖然梁振英又要忙搬屋又要招呼習近平，但佢仲記得向全體公務員發信，代表問責團隊感謝全體政府同公務員，過去5年緊守崗位，盡職盡責，為香港社會及經濟發展、為改善市民生活辛勤付出，仲叫大家支持同配合新一屆政府施政。好多網民就對梁振英終於落任好高興，有人話想一腳伸佢返大陸、亦有人叫佢一路好走，以後唔好再見！
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk