灣仔會展噚晚舉行慶回歸文藝晚會，一班新聞界朋友終於唔使再望住習大大車出車入，可以入場堂堂正正共處一室咁採訪——雖然記者區同佢仲係隔咗成200米咁遠。
晚會由一條回顧短片開始，大屏幕先後播放江澤民當年嚟香港嘅畫面，以及習大大前日落機嘅片段。現場觀眾亦相當識做，只喺close up習大大嘅時候先送上掌聲。
傑出運動員做佈景
多位歌星演員輪流登場表演，宇宙最強甄子丹、天王黎明等都有上去露兩手，就連一班香港傑出運動員好似女車神李慧詩、女飛魚歐凱淳等都被安排做佈景板，一人拎住兩碌棍敲敲吓。去到晚會最後習大大居然有驚喜，帶埋梁振英同林鄭月娥上台，一齊合唱《歌唱祖國》，搞到全場觀眾we嘩鬼叫。其間習大大仲輕輕轉身，同汪阿姐寒暄幾句。
噚晚個文藝晚會前，特區政府仲搞咗個歡迎宴，究竟有乜嘢食？個菜單連果盤、點心，有成10道菜，有蟹蓋、大烏參、海上鮮，真係好豐富，好多出席晚宴嘅人都話食到飽飽。（習近平歡迎晚宴菜單：迎賓大拼盤、香酥鮮蟹蓋、淮山杞子響螺燉豬腱、碧綠蝦籽大烏參、古法清蒸海上鮮、翡翠北菇素荷包、竹籠瑤柱雞粒荷葉飯、紫米露、甜點心、鮮水果）
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk