求驗客手記:拒做「黃大仙」三救12碼巴禾完勝C朗

求驗客手記:
拒做「黃大仙」三救12碼
巴禾完勝C朗

周三喺俄羅斯喀山上演嘅洲際國家盃四強賽,上季喺曼城醜態百出嘅智利門將哥迪奧巴禾,竟然變身贏波英雄,喺互射12碼階段連撲出對手葡萄牙三球12碼,幫智利喺呢場120分鐘互無紀錄嘅悶戰中,最後憑PK戰贏3:0,率先入決賽。

C朗(左)喺成個互射12碼過程得個睇字,梗係黑晒面喇。 路透社

助智利氣走葡軍入決賽

智利同葡萄牙喺法定時間及加時後仍踢成0:0,最終要互射12碼決勝負。結果,上季效力曼城被譏為有「球」必應嘅智國版黃大仙巴禾,突然「神龍」上身,先後救出哥利斯馬、摩天奴同拿尼主射嘅頭三輪12碼,而智利陣中嘅維達爾、艾蘭古斯同阿歷斯山齊士就全部射入,最終就憑PK戰以3:0氣走葡萄牙,率先晉身下周日嘅決賽,將同周四另一場四強賽德國對墨西哥嘅勝方爭冠。
巴禾出戰洲際盃前,因為小腿有傷自四月以嚟一直缺陣,到第三場分組賽對澳洲先復出,而佢賽後坦言其實不在最佳狀態︰「我之前有傷,到𠵱家都未回復正常節奏,但我係一個好鎮定嘅人。」問到關於撲12碼嘅秘訣,佢就話係秘密,但就讚係全隊功勞多於佢一個。

哥迪奧巴禾(左)今場連撲三球12碼,包括最後呢球撲出拿尼嘅主射。 路透社

C朗探孖仔唔踢季軍戰

場波最失意嘅自然係基斯坦奴朗拿度,本身想攞埋洲際盃來延續風騷嘅一年,點知今次都未輪到佢主射,就眼白白睇住球隊已被判死刑,亦係繼2012年歐國盃四強鬥西班牙場波後,另一次喺PK戰得個睇字。不過,人生又點止踢波,C朗證實啱啱又做老竇,佢搵嘅代母已經誕下一對孖仔,而C朗亦獲葡萄牙批准提早離隊,唔使踢季軍戰。