國家主席習近平訪港3日，亮點除咗佢點樣力捧新特首林鄭月娥，當然仲有陪佢訪港嘅夫人彭麗媛。由於彭麗媛此行係要做親善大使，喺另一半硬打港獨之時玩軟銷，難怪都要展現一下親民作風，噚日中午一落機就去咗位於大坑東嘅又一村學校參觀，仲同成千幼稚園學生打成一片，雖然冇開腔唱歌，但就送咗個香吻畀一位細路哥噃！
查實呢，彭麗媛入幼稚園探訪時，傳媒冇得採訪。政府新聞處話喎，彭麗媛今次參觀係想了解免費優質幼稚園政策嘅推行概況，而又一村學校就係參加計劃嘅非牟利幼稚園，成場參觀歷時只係廿幾分鐘。據同學仔會後透露，學校安排咗中國舞、芭蕾舞、唱國語歌等表演，彭麗媛就用普通話介紹中國著名點心，之後學校就派一人一盒100支水彩筆畀佢哋開開心心返屋企，但似乎大部份同學仔都唔知彭麗媛係咩大人物，讀K3嘅黃小朋友則負責將一束粉紅色嘅花獻畀彭麗媛，彭收花後好開心，仲錫咗佢左臉一啖！就讀K1的林同學就話，獻唱嘅國語歌係老師用15分鐘教佢嘅，彭麗媛聽完「讚我哋叻叻」，又有同學仔話老師預先教定用普通話講「阿姨歡迎你」。
彭麗媛離開記者區廿幾呎遠落車時，聽到記者大聲問問題都停低兼回眸一笑，再行出空曠啲嘅地方揮手任影唔嬲。八方問佢「你覺得香港感覺如何？」佢廿幾呎遠噏咗個「好」字。
家長投訴暴曬小朋友
有家長就向《蘋果》投訴，話呢場親民騷校方事前冇發正式通知，係家長間WhatsApp群組互通消息先知有大人物到訪，覺得校方安排失當、處事唔透明，又話班小朋友其實同記者一樣，暴曬一輪先恭迎彭麗媛。
而彭麗媛着乜衫，亦係焦點，日間白色外套配淺啡色裙配白色高踭鞋，唔少人都覺淡雅自然、大方得體，夜晚就換上絲質棗紅色繡花旗袍配黑色高踭鞋。至於髮型就如常咁梳得好高，呢啲似乎就係Chinese style。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk