陳瀅同麥美恩噚日為海洋公園主持夏水禮揭幕，被安排坐喺沙雕中扮美人魚，大熱天時，披住外套嘅陳瀅，自爆冇戴胸圍，佢話：「事緣係自己太大汗，入面件衫唔可以着有帶嘅內衣，着咗黐嘅bra，點知大汗黐唔實，𠵱家冇戴，好free。」陳瀅仲話喺屋企同去外國都唔鍾意戴bra，細細個就鍾意裸泳：「我喺多倫多出世，住嗰間屋出面有泳池，細細個到6歲就唔着衫去游水。」唔怪之得，之前本寫真影嘅相甫士擺得咁自然。
麥美恩話想試
麥美恩即刻喺側邊幸災樂禍話：「我着sports bra，冇事。我冇乜本錢騷呀，今日平起平坐，天氣咁熱，有夏日氣氛嘛，着少啲冇所謂嘅。」咁問麥美恩有冇試過裸泳呢？地道港女，就梗係冇試過喇！佢話：「望過喺大學附近嘅天體沙灘，但自己太白太似光管，所以都唔敢入去，或者第日有機會，試吓搵一次豁出去。」佢仲話：「𠵱家可以同啲close啲嘅朋友，或者結婚前做一次，搞個派對，最緊要有嘢食。」之後麥美恩又嘲笑自己身材平平無奇，佢話：「平有平好，健康就OK，着乜都冇所謂，最緊要舒服。」
撰文：馮仁昭
