踢波可以好危險，隨時連命仔都不保。上周日喺巴西東南部一場業餘聯賽，吹雞呢場比賽嘅球證同球員發生爭執繼而動武後，突然走到場邊攞支槍出嚟，段片喺網上已經流出，真係嚇到大家心都離一離。
呢場由Oriente主場對Industrial嘅賽事，球證迪蘇沙（Camilo Eustáquio de Souza）判罰客隊個門將喺禁區內撲跌對方球員犯規，直指12碼，而客隊班球員好嬲，同迪蘇沙出現衝突，其中一位叫馬高斯韋拉嘅球員，涉嫌打咗迪蘇沙塊面一拳。結果，成隻眼都腫晒嘅迪蘇沙即刻走到場邊摷袋，之後掹咗支槍出嚟兼擸埋孖葉，據聞當佢走返場內時，馬高斯韋拉已經極速跑出球場，走咗番更衣室避難。
雖然迪蘇沙冇真係喺場上開槍，但呢個場面真係嚇到兩隊波啲球員全部呆晒，大家可能都好奇怪點解迪蘇沙會有把槍喺個袋度？原來佢全職係一位差佬，而剛好Industrial個教練亦係一位退休警察，賽後就狂斥迪蘇沙：「我同球員講過話尊重球證，但球證咁做太過份。」
不過，迪蘇沙賽後接受傳媒訪問，就指住自己瘀咗隻眼，證實自己有幾傷同幾嬲，仲解釋話自己唔係真係想開槍，只係要維持場上秩序：「我只係想警告佢哋要小心。」據聞賽會已經調查緊成件事，而迪蘇沙呢個危險行為，有可能要停賽長達兩年。