本周六（7月1日）沙田7.1賽日舉行七草三泥賽事，草地用A加3欄作賽，睇番最近5月7日同一移欄，前置馬仍然佔盡優勢，共有八匹頭馬守前四位入直路建功，當中「非常堅」、「智者」、「詠彩繽紛」及「一片光明」都係放頭帶到，具前速之馬匹無可避免要優先留意。
今戰列陣馬中，第四場的「非常堅」正是於5月7日田A加3欄勝出，重返強項可以回復表現；另外，第七場「劍斷浪」兩次角逐A加3欄獲一勝一位，亦係全場唯一贏過此移欄之參戰馬，憑較佳場地性能可再下一城。
至於泥地中距離，除非跑濕泥，否則居中後上馬絕不下風，早前「雲呢拿」（已退役）、「大爆發」及「人民武士」都係守於中間位置，入直路憑後勁衝贏對手，所以分別出戰第三場的「幸運神駒」、第六場的「威勢之寶」及第八場的「金太陽」等擅跑泥地之後上馬咪睇小。