恒生銀行(011)新舵手鄭慧敏(Louisa)將於7月1日履新,現任副董事長兼行政總裁李慧敏(Rose),同日榮休。噚日喺恒生博愛堂,新舊一姐率先同場亮相,既歡送Rose姐亦順道向客戶正式介紹Louisa登場。
據聞,現場人山人海,除各業務部門主管同高層外,即將拜拜嘅兩位局長──財庫局長陳家強、教育局局長吳克儉亦有現身,仲有紀惠集團行政總裁湯文亮。湯文亮話,噚日係恒生向客戶介紹新一姐,大家見個面、影張相,遲下再約傾偈。
呢個送舊迎新酒會,由下午4點鐘,開到晚上7點幾,相當熱鬧,恒生好多私人及工商業務客戶,皆畀面出席,兩位一姐都揀咗深色系列衣服現身,Rose姐dress code當然係佢摯愛又高貴嘅黑色,Louisa就着沉色行政套裝。
幾位恒生董事都在場,包括身任非執董嘅匯豐副主席兼行政總裁王冬勝、恒生獨董陳祖澤、利蘊蓮;另外仲有立法會主席梁君彥。
97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk