五位曼聯「92班」名將周四訪港，除咗宣傳贊助商、手機應用程式Ballr之外，其中一個活動就係去「超人」誠哥舉辦嘅電競活動。
李嘉誠基金會搞咗個電競擂台嚟做慶回歸活動。誠哥向來鍾意投資高科技，亦睇好電競發展，例如佢投資遊戲設備公司Razer（雷蛇）。誠哥眼光好，佢睇中嘅行業應該有得發圍，值得我哋參考吓。對於本報以至大部份傳統媒體嚟講，電競等同打機，除咗副刊科技版間中會報吓出咗咩遊戲之外，都唔會點提；近年頂多係港聞會做吓啲機手嘅故仔，講吓佢哋點樣靠職業打機為生。不過，傳統媒體係唔會教人打機，提供遊戲攻略，甚至係報道一場遊戲比賽。因為傳統媒體覺得打機攻略根本唔係新聞，兼好似教壞細路咁。
不過，唔止誠哥投資；當亞運列咗電競做比賽項目，電競產業越做越大，香港選手仲有能力贏世錦賽時，我哋係咪開始當電競係正式運動去看待呢？作為體育版嘅一分子，我哋係咪都要了解電競嘅玩法，同埋為電競迷報道遊戲嘅最新消息同埋一啲攻略呢？就好似報道田徑咁，我哋既要報道頂級選
手嘅新聞，亦要教普羅大眾去玩呢種運動。作為體育新聞工作者，教人正確地跑步，好合理，但講到教人打機打得叻，就好似怪怪地。我哋要用一種咩態度去報道電競呢項運動？視而不見定係深入報道？值得老細同各從業員深思。文：咖喱