幾時都話季尾出賽用見習騎師減磅大晒，更何況係十磅減到盡嗰隻！今晚（28日）谷草第二場四班一哩，姚本輝馬房「盈豐駿駒」續配潘明輝減十磅。結果此駒連續四場屈居亞軍後終於坐正，近兩季首度贏馬，單Win及組合獨贏A1分別派30及19.5元。
年屆七歲的「盈豐駿駒」是今場最年長馬，本身素來有「最冇運忠心馬」之稱，演出準而難，之前只獲兩捷，惟位置卻有14次之多，上季4次跑第二，今季亦5次得亞軍，合共9度入Ｑ，今晚之前此駒對上一次贏馬，已數到前季即15年6月10日贏谷草一哩。
好在「盈豐駿駒」今仗十分生性，呢匹3倍大熱門貼欄一放到底，輕勝1.5馬位，助姚本輝守齋5個賽日後重開勝門。姚本輝表示「盈豐駿駒」今仗贏在天時、地利、人和，因為潘明輝一早答應騎「勇創潮流」，好彩四班一哩拆開兩組，「勇創潮流」拆去了第三場，令小潘得以為「盈豐駿駒」主㘘，十分幸運，加上排6檔有利，馬兒亦忠心，遂能取勝。
講番「火車潘」潘明輝，上周三（21日）晚於谷草錄得在港出賽首次冇馬贏，今晚再戰同一地點有馬贏，加埋剛周日（25日）於沙田起孖，個人重新連勝兩個賽日，在港累積18Win，贏多兩場就升格轉減七磅。
第二場二至四名順序為「騂龍」、「順其自然」及「心中有善」，四重彩派三萬蚊鬆啲。