下周三（7月5日）停火冇馬跑，練馬師方嘉柏貴為谷草王，今晚（28日）谷戰當然唔執輸，第一場五班2200米，即同老戰友潘頓合作贏「進綵」，該駒終於打破本身接近一年半齋缽，單Win及組合獨贏A1分別派42及22元。亦是潘頓今季第100Win。
六歲法國自購馬「進綵」來港後一直只贏過田草2000米，今季更加長跑長輸。呢次係季內第17次出賽，季內已喪減36分之多，今次首度用潘頓，沿途居後守第九位，直路在外疊加速甚勁，大勝2.5馬位，跑出2分16秒33亦刷新同班同程紀錄時間，乃女馬主王錦汶季內首捷。
無巧不成話，方嘉柏於6月14日谷草夜馬勝出「好醒」，該駒當時亦是跑頭場，馬主王經緯與王錦汶屬姊弟關係，王氏家族可謂季尾轉運。
方嘉柏表示「進綵」之前健康有很多問題，例如腳部不良於行，需要很長時間治理及部署減分，他一早已部署此駒跑今場，賽前他對馬主表示，如果今場落到五班都贏不到，恐怕以後亦難取勝，很開心能為此馬重開勝門。而馬兒將會在沙田煞科日四班田草1800米上陣。王經緯表示賽前對「進綵」有一定信心，因為落到五班有利，上場谷草一哩得第五已跑得很好，今仗2200米更合適。
頭場二至四名分別為「頌義」、「歐洲之星」及「智有心得」，四重彩派11萬幾。當中「頌義」因應騎師梁家俊體重，超重四磅上陣，結果以冷門身份後上第二。