香港藝術館趁北京故宮養心殿維修期間，借得共236件真品文物來港舉辦「八代帝居—故宮養心殿文物展」，以原狀陳列方式還原清代帝皇「Home Office」嘅正殿、東西暖閣及三希閣，館方仲搭建出1：1三希堂模型，畀市民打卡「呃like」，感受乾隆書齋氣息。
位於北京紫禁城中央偏西嘅養心殿，自雍正皇帝以來一直係清廷行政決策中心，今次大部份展品都係首次出宮，會按宮裏擺放位置及角度陳列。展覽正中心係養心殿嘅正殿，係歷任皇帝接見朝臣嘅禮堂，中間放有以黃花梨木製成嘅寶座，背靠乾隆御筆屏風，頭頂掛上雍正親書嘅「中正仁和」牌匾，四周放有香爐，完美還原皇家大氣格局。
除牌匾外，展覽同時有多個珍品，包括全球只得4隻、皇帝除夕倒數飲酒用嘅金甌永固金杯、皇帝打邊爐用嘅火鍋套裝、有皇帝牙印嘅筷子等，展覽即日起於沙田文化博物館舉行。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk