上季贏得「告東尼獎」（頒予全季最多頭馬的本地騎師）的蔣嘉琦，雖然數字上仍有機會衛冕，但佢仍停賽中且氣勢大不如前，好多馬迷已當佢冇到。
暫時新一屆「告東尼獎」呼聲最高係家陣有25Win之梁家俊，領先巫顯東4場，而潘明輝氣勢雖強，卻始終3月26日才首次上陣，目前有17Win要趕過梁家俊唔易。
不過，家俊仔本月只贏過「經典帝國」一場，其實手風唔太順，而周六（7月1日）沙田日賽三班田草1200米，他亦未能再騎私家馬「財高八斗」。睇賽績，「財高八斗」暫時4戰俱是同程1200米，全配家俊仔，初出輕勝盡顯潛力後，一連三仗家俊仔都搏失屈居亞軍。本周一「財高八斗」已由李寶利過檔彈草閘，意味將換人出賽！
與此同時，家俊仔重新過檔同場容天鵬馬房「極速前進」，家俊仔之前曾策此駒取一冠一亞，其實亦甚具實力。究竟係「財高八斗」飛起家俊仔，抑或佢揀騎「極速前進」？大家可能有唔同睇法。不過「財高八斗」上仗讓同是3歲馬的「極速前進」1磅，負磅接近下，「財高八斗」足足早兩個馬位過終點，今次「財高八斗」增至讓3磅相差不遠，所以「極速前進」仍不易反先。