星期六就到回歸20周年呢個大日子，即係計一計，回歸之後先出世嘅香港人，最老都已經20歲，計埋BB時期乜都未知，難怪有大學生組織之前已經話六四事件與香港人無關，隨住更加少香港人經過港英政府嘅管治，對以往嘅所謂香港核心價值，都只會越嚟越模糊。
其實所謂世代之爭又何止政治，足球咪又一樣；父輩深受比利影響，捧巴西捧到上天，小弟86年先叫真正睇世界盃，就同佢拗吓頸死撐法國，結果巴西對法國嘅經典大戰贏得漂亮一場，到大個自然捧施丹；或者回憶總是美好，嗰陣真係足壇人才輩出，99年英足盃準決賽，傑斯獨闖龍潭射破阿仙奴大門，記得小弟仲喺大學宿舍嘅Common room一齊睇，結果百幾二百人大叫，最後搞到宿監上嚟熄電視，好彩比賽都完場。
問一問十幾二十歲波友，又有幾多人覺得傑斯係最佳左翼？畀佢哋揀一定係C朗、尼馬、山神等等啦，你話係傑斯，只會俾人笑係老餅。其實連施丹都做埋皇馬雙料冠軍教練，傑斯咁上下年紀，連普捷天奴、干地都做埋英超領隊，連法蘭迪保亞、柏歷堅奴新一季都嚟英超，傑斯反而未真正坐正過，都真係奇。當年費Sir悉心栽培傑斯做接班人，莫耶斯被炒後做過一排暫代領隊，但曼聯管理層始終重名氣多，寧願搵雲高爾同摩連奴等名帥，都唔升正紅褲子出身嘅傑斯。傑斯不甘做摩連奴副手仲走埋人，講真傑斯嘅能力一定有，但或者球會管理層擔心佢太大魅力，反而更難控制，先至唔敢請佢。
文：牽牛