話口未完，第四場又輪番小潘贏馬，今晚（28日）谷草上半場完全無「潘」不歡，「大潘」潘頓贏一、三場，「小潘」潘明輝贏二、四場！
「火車潘」潘明輝繼第二場勝出大熱門1號「盈豐駿駒」（姚本輝馬房）後，第四場四班1200米再贏1號大熱門馬，呢場佢騎方嘉柏馬房「澤心星」建功，單Win及組合獨贏A1分別35及24.5元。
5歲馬「澤心星」與由潘頓食出頭糊的「進綵」同樣來自方嘉柏馬房，季內上陣次數雖不及「進綵」17戰，但連同今仗「澤心星」季內亦有15戰之多，此駒今場沿途前置，直路帶出輕勝1.5馬位，已一連三戰取兩冠一季，堪稱季尾之星。
今場同時係潘明輝首策「澤心星」即勝，此駒季內兩捷分別由潘頓及潘明輝經手，馬主可謂與潘有緣，至於方嘉柏起孖，亦錄得近一個月內單日最佳成績。方嘉柏罕有作出評價潘明輝，他表示「澤心星」上仗用潘頓得季軍只輸短頭位，已經跑得很好，今次潘明輝發揮亦非常出色，騎得冷靜又有功架，深信這位小將未來前景十分秀麗。
第四場成為細冧巴馬天下，1號「澤心星」勝出，4號「紅旗星將」後上第二，5號「紅星」第三，2號「招多福」第四，四重彩派一萬一千幾。