相信大家去台灣、日本呢啲地方旅行，見到啲造型特別嘅郵筒，都會同佢打卡影相，但其實大家又知唔知，全香港1500個郵筒入面，都隱藏住好多特色郵筒？
記者：倩宜
最大年紀
位於九龍塘玉蘭路嘅呢個郵筒，屬於佐治五世嵌牆型，係全香港服役中嘅郵筒入面，其中一個年紀最大嘅郵筒，大約有80年歷史。而佐治五世嘅郵筒，全香港亦係得返7個，當中4個係嵌牆型，另外3個就係柱形。
最堅硬
位於九龍城南角道嘅呢個揹仔郵筒，全香港只得一個，佢最特別之處，除咗係側邊有呢塊曾經係郵票售賣機嘅板之外，佢仲曾經救過兩名警察。因為80年代有好多搶劫案，當年有賊係持槍打劫金舖，咁啱俾兩個巡邏警員見到，於是雙方展開駁火，兩名警員因為企咗係郵筒後面，郵筒幫佢擋子彈，兩個警員先無受傷。
最離奇
呢個位於中環皇后像廣場嘅橢圓雙口仔，又係全港只得一個。除咗外形特別之外，佢嘅身世亦都好離奇，因為佢身上印住嘅係蘇格蘭皇冠。當年蘇格蘭皇冠郵筒係喺英國同蘇格蘭使用，而當時英殖時期嘅香港，用嘅都係英國皇冠，所以呢個郵筒點解會運咗嚟香港，至今仍然係一個謎。