告東尼馬房「巴基之星」剛戰喺精英碟，只跑了一段極短路程便玩「罷跑」完全停低，雷神莫雷拉要狂鞭先至肯恢復奔跑，結果大包尾，跑出2分47秒1，比頭馬「馬上發財」大概慢一分鐘。
「巴基之星」1.2倍超級大熱門就此倒灶，由星球馬變性格巨星，成為全港熱爆話題。雷神亦因狂鞭「巴基之星」，令隻馬鞭痕纍纍，被罰款一萬元。唔少網民話雷神唔夾「巴基之星」，應畀返蔡明紹騎。
「巴基之星」日後試閘同出賽會由邊個騎，要由告東尼同馬主丁志強決定，但這天(27日)另一冠軍級好手潘頓就公開同記者講，佢話如果幕後考慮換騎師嘅話，自己好希望亦好樂意接手「巴基之星」，仲話有時轉一轉配搭，為賽駒帶來新鮮感，可能令佢增強鬥心，或者唔會再慢閘及「罷跑」。
記者就問潘頓，冠軍騎師雷神都搞唔掂「巴基之星」，你何來信心駕馭到這匹性格巨星？潘頓笑言自己有絕招，令「巴基之星」在他胯下肯全力競跑，只希望告東尼和馬主丁志強給予機會他一試！
其實潘頓騎臭檔馬確有一手，前短途馬王「友瑩格」便出名臭脾氣性格兇惡，但卻可在潘頓胯下11捷，贏過多項大賽。