問責官員輪住落區慶回歸，就算只係過度性質嘅律政司司長袁國強，都要身體力行，噚日去到灣仔區家訪，同場亦大派禮物包，佢話灣仔係多元文化薈萃嘅社區，18萬人口中非華裔人士佔5分1，長者人口亦較其他地區多，趁家訪可推動社區共融。
袁國強之後會見傳媒，被問到港澳辦主任王光亞近日同新班子會面，外界質疑話係干預時，佢話香港官員同內地官員見面係無可厚非，唔見面唔交流，先係唔正常，總之溝通唔不等於干預。
盛傳袁國強答允搞埋高鐵嘅一地兩檢問題先離任，咁查實一地兩檢有乜最新進展？袁國強大賣關子，話未適合公佈詳情。
點解咁神秘？袁國強解釋因為事件涉及憲制、法律問題，好鬼複雜，不宜未落實就公佈，重申𠵱家同內地雙方仍然以符合《基本法》及一國兩制，及2018年高鐵通車嘅目標嚟解決一地兩檢問題。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk