【本報訊】2014年引來全城瘋搶的首批復售居屋5個屋苑的業主陸續「收鎖匙」入伙，其中青衣青俊苑近月有業主收樓，記者隨驗樓師到訪一個400多呎的中層單位驗樓。除了開門見廁設計，業主及驗樓師綜合出單位5大騎呢位，包括廚房去入水位有距離、插蘇位離地太遠等。
記者：譚靜雯 鍾雅宜
政府2014年復售居屋，首批居屋屋苑被指大門對正廁所；單位設計、外觀及間隔更被指與公屋無異。其中青俊苑共有465個單位供選購，業主等候逾兩年，近月陸續獲房署通知取匙入伙。《蘋果》記者隨專業驗樓師鍾智剛到訪一間中層7室、面積約430平方呎單位驗樓。鍾智剛發現，單位廚房設計不夠貼心，因洗衣機水喉位置接近廚房門口，但去水位卻設在近窗位置，兩處有一定距離，「呢類單位屬半裝修式單位，理論上去水位應該做好晒，唔使再接駁水喉，但若果咁樣設計，業主要另外再搵水喉師傅整一小截水喉，收費相對較貴」。
業主亦發現單位其他騎呢位，如客廳、睡房、廚房及浴室均配備燈嘴，但燈嘴是市面上較難購買、俗稱「釘頭」舊款式，有別於常用的螺絲頭，業主指收樓後找遍多間電器店才成功購買釘頭燈泡，料裝修時會全部拆除改成螺絲頭。
洗手盆無法儲水
業主指兩間睡房燈掣位置亦較騎呢，他指一般睡床會放在近窗位置，房間另一邊安裝房門，若如此設計，燈掣便會位處房門後，「我一開房門，唔可以即刻開燈，要入咗房閂埋門先開到燈」。
兩間房的插蘇位離地一米，有別於客廳設在地腳位置，業主認為在使用上會有不便，要額外花錢重置在近地腳位置。他粗略估計單是更改插蘇位置、換燈嘴及加裝洗衣喉等工程，估計可能要額外花近兩萬元。
業主亦從大廈處理單位執漏問題的人員口中得悉，大廈有不少單位的煤氣喉過長，「因為條喉太長，裝煤氣爐時條喉會頂住個爐，有工人會強行將條喉推出啲，搞到條喉同外牆石屎有少許分離，可能會有漏水」。
除了騎呢位，單位亦有不少甩漏，鍾智剛指廁所洗手盆水龍頭較鬆，「日後有可能越來越鬆，一開 水龍頭可能飛埋一邊，亦可能會漏水」。洗手盆亦無法儲水，估計是去水位有罅隙；他亦發現房間其中一隻窗的窗門與窗框之間有罅隙，闊度足以攝入一張信用卡，「有空隙即係有可能入風同滲水」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk