英超球隊水晶宮周一宣佈聘請荷蘭籍主帥法蘭迪保亞嗰陣，當然例牌影番張舉衫相啦，順便公佈埋今季換咗新贊助商，由菲律賓博彩公司明陞，變成一間叫做萬博（ManBetX）嘅集團。呢間公司話就話係提供體育博彩嘅遊戲企業，但就有啲掛羊頭賣狗肉之嫌，因為官方YouTube頻道就有成50條靚女片，而且被英國傳媒《太陽報》報道後，仲鏟晒啲片，好似有景轟喎！
被查即刪性感片
水晶宮喺官方新聞稿度，指萬博係一間為顧客提供體育博彩同賭場相關產品嘅國際遊戲企業，呢張多年贊助合約嘅價值，仲進佔英超第八位，以球隊過去一季英超僅排第14位，聽落相當和味。有英國傳媒變身起底組，調查吓萬博咩來頭，指佢哋係一間2007年喺馬耳他註冊嘅公司，受英國博彩當局監管，但同時發現官方YouTube頻道大約有50條片，但多數都唔關體育事，反而係童年爛gag「睇肉」居多；唔係女模硬照花絮，就係性感體能教練做gym，仲有位女模表演拉低件衫然後嘔奶落自己個胸，非常惹火。所有片嘅共通點就係令人想入非非，橫睇掂睇似成人台多過體育台。
經過英媒嘅廣泛報道後，呢啲片段已經被刪除，會唔會更加令人覺得瓜田李下呢？睇番呢間公司嘅其他社交網站，twitter戶口今年一月先開啟，註冊地就去咗菲律賓，而呢個戶口同fb就正經得多，更新雖然唔算頻繁，但總算講番運動，惟獨微博就有唔少博彩資訊。
古古怪怪唔緊要，最緊要有錢畀，今次嘅贊助費銀碼雖然冇公佈，不過話晒排英超第八，數目自然唔簡單。水晶宮主席派利殊就話：「我哋喺全球嘅球迷基礎越來越廣泛，加上英超嘅吸引力，令萬博成為我哋嘅合作夥伴，希望透過球會，將呢個品牌發揚光大。」大家睇過呢間公司嘅宣傳片段，係咪覺得好有吸引力呢！