坐擁近千億物業王國嘅賭王「四太」梁安琪，近年晉身發展商行列，買地起樓再賣散。公司第一個樓盤噚日開價，樓盤現場見唔到四太，由公司行政總裁吳士元傍住太子爺何猷亨（Arnaldo）負責打點。
何猷亨由細到大見慣傳媒，呢日講樓盤都頭頭是道，冇怯場。佢指，壹嘉係佢第一個接觸嘅地產項目，由兩年前開始，每逢禮拜三都會跟同事落地盤，同判頭開會傾工程進度。兩年間，落手落腳跟進樓盤開則、監督施工，覺得地產呢行都幾有趣，整體感覺唔錯，佢仲忽然地產代理上身咁話「磚頭係最穩陣，有嚿嘢喺度吖嘛！」
年僅24歲嘅何猷亨一身職銜，由賭業、地產到慈善機構瓣瓣都有佢足跡，佢話，嚟緊賭業同地產兩邊都會繼續擺時間落去，一直邊做邊學。
一直在旁嘅吳士元，在公係何猷亨師傅，在私係佢uncle，佢認為，何猷亨係成年人，唔使人特別照顧，佢只要好似一嚿海綿咁，從工作中吸收經驗就得嘞。臨尾，佢不忘讚番句:「我好相信Arnaldo會青出於藍，做得更好。」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk