新一屆特區班子7.1上場，運輸及房屋局局長張炳良堅拒留任，由機電署署長陳帆升呢做局長。運房局被視為最棘手嘅政策局，同時要做埋房委會主席一職，隨時忙到假都唔得閒放。
「房屋問題係DNA一部份」
張炳良噚日最後一次以房委會主席同局長身份主持房委會大會。會議接近尾聲，佢同班委員分享自己嘅感受。佢話1992年開始加入房委會，曾經做過唔少小組委員，更做過資助房屋小組主席，同房委會結緣已經有四分一個世紀。
不過，2000年發生居屋短樁事件，當年房委會主席王䓪鳴因短樁醜聞引咎辭職，佢自己基於道義同埋承擔責任就一齊請辭，其後輾轉入返房委會小組。笑言經歷咗廿幾年，房屋問題已經係佢DNA嘅一部份，7.1後回復平民身份，會繼續關心房屋問題，甚至會去大會旁聽。
位於何文田嘅房署總部出名保安森嚴，張炳良話90年代房委會開會時比𠵱家更「熱鬧」，因為逢開會必有示威，仲試過有人衝入房委會總部，所以後期總部保安好嚴謹。佢最後透露上周已同陳帆交接晒手頭上嘅工作，呼籲委員支持佢。發言結束後，委員都拍手支持，仲一齊影咗張大合照。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk