回歸20年，仍然繾綣英國殖民，已故名人周啟邦之子周國豐（Brandon）的家族，自20年代在香港扎根已經到第五代。Brandon在英式養份下成長，在英國留學、現職大律師，鍾情溫文爾雅的西裝服，他更將這份passion提升，開生活服飾店，將認為英國人留下最美的禮儀延續下來。
周國豐是已故名人周啟邦獨子，30出頭的他是大律師，一年前在中環開設生活西裝店Attire House，販賣充滿英式優雅情懷的生活態度。Brandon表裏合一都非常貫徹英國情意結，愛打在英國留學時的欖球、劍擊，結婚揀英式情懷的半島酒店舉行婚禮、收藏傳統英式西裝、燕尾服和愛飲afternoon tea，連Ig名都改做gentlemen_class_，放滿無窮變化的西裝造型生活相，絕對是富二代中，iconic英式表表者。
四大家族後人
Brandon的家族及成長環境，都與英殖時代有緊密關係，他是香港四大家族（周錫年、何東、利希慎、李石朋）後人，祖父周錫年在戰後先後擔任立法、行政兩局首席非官守議員，有CBE、JP等銜頭，戰前第一個搬上半山的華人，父親周啟邦是大律師，Brandon童年住在摩星嶺英式洋房，七、八歲就開始西裝打扮，他表示：「我第一次學打呔係小學三、四年級，我爸爸教我打呔，呢個記憶好深刻，我諗起我爸爸，好多時都係諗起呢一幕。」他愛聽舊故事：「好多嘢我都係聽番我父母講，原來𠵱家Landmark係以前一間好出名酒店嚟㗎，叫覺羅士打，佢哋以前會去嗰度afternoon tea。」
97年政權移交，當時讀中學的Brandon在會展附近食飯睇電視直播，「個個都記得國旗升降，嗰個畫面都幾iconic，影到查理斯王子見證呢個歷史時刻，當時好多人話佢發緊白日夢，突然之間國旗落咗，佢望一望，亦都有彭定康上船走，可以搭飛機點解坐船，當然成件事都係一個儀式，主權移交、撤走。」Brandon不久去了英國讀中學、大學，「喺讀書嗰段時間可以話係最開心時間。一班男仔，一齊生活，每日都好有規律、好團體。英國好重視個人發展，同多方面發展，每個人都有自己專長、興趣，呢樣對於我日後性格影響幾大，所以我希望日後小朋友會經歷呢樣嘢。」
自言是個愛緬懷過去的人，Brandon說 ：「啲的士司機好鍾意問，知你喺香港嚟，我當時話差唔多，制度冇變，大律師仲係戴假髮，但係返嚟覺得，無論係建築物、社會氣氛、感覺係唔同咗，我會想保留番少少呢啲英國文化，因為始終係香港一部份，亦都係香港人文化記憶一部份，好多嘢消失咗係有啲可惜。」
英式禮儀之最
提到英式文化最美好的事情，Brandon認為是禮儀：「呢一樣嘢無論你喺邊一個國家都係需要學嘅，係人同人之間嘅尊重，人同人之間有個好proper greeting，大家會握手，問候吓大家，見到女士幫佢開門，甚至乎我爸爸個年代，佢教我女士入嚟要起身打招呼，會錫面、拉椅同送佢去洗手間，我都好習慣性做呢件事。𠵱家簡化咗好多嘢，有好多女士都唔習慣，但我覺得嗰個spirit好重要。」
採訪：梁錦雯、馮國康
攝影：陳俊強
周國豐所開的Attire House，崇尚紳士打扮的服飾，由casual的衞衣到formal的煲呔、絲巾、帽子、以至英國常下雨必備的雨傘都一絲不苟。
【從Savile Row到開店】
周國豐構思了六、七年時間開Attire House，除專售度身訂做西裝，傳統的理髮妝容服務都包辦，如採訪當日，皇室御用裁縫品牌Anderson & Sheppard便由倫敦到訪，為客人度身。對於西裝服，Brandon視為一種passion，他說：「好似好多人鍾意玩音響，鍾意玩電單車，我就變咗係鍾意西裝。我覺得都係一個學問，呢個學問係可以去鑽研。」
「買嘅似人哋」
七年前，Brandon首嘗去倫敦裁縫名師集中地的Savile Row見識，「敬仰咗呢個地方好耐，知道係好出名做英式西裝 ，以前讀書嗰陣afford唔起，做咗大律師之後就想做番一兩套、專業啲感覺嘅西裝。做西裝係個好正嘅體驗，去揀唔同布料，同裁縫溝通，做一套真正屬於你嘅西裝。去買一套西裝個感覺都好似唔係屬於我咁，好似我買緊人哋嘅衫，但如果度身訂做，係真係屬於我。」
更多精采時尚內容，盡在 http://add.appledaily.com 。