經過周日洲際盃最後一輪分組賽，四強全部誕生，A組首名葡萄牙周三會喺喀山，同B組次名智利爭入決賽，基斯坦奴朗拿度（C朗）仲會同阿歷斯山齊士（山神）交手。
又傳阿古路換山神
周日洲際盃B組最後一輪分組賽，智利雖然要鬥數同德國爭首名，不過就唔爭氣，上半場先失守，靠後備馬田洛迪古斯下半場建功先1:1逼和澳洲，德國就順利大勝，智利只能次名出線，要喺準決賽惡鬥葡萄牙。拜仁嘅智利中場維達爾話：「智利唔怕任何對手，雖然佢哋係歐洲冠軍，不過我哋鍾意同高水平對手交戰。」山神同C朗一樣都陷於轉會新聞，最新就話曼城願意以阿根廷前鋒阿古路作籌碼，同阿仙奴交換山神，不過點都好，山神想提升身價，洲際盃一定要有好表現。
葡萄牙所屬嘅A組，上周六已經完成分組賽，C朗又射入12碼下，以4:0大勝新西蘭拎到首名；周日練波就可以輕鬆啲，準備周三嘅四強戰。貴為葡萄牙隊友，要幫國家隊繼上年歐國盃後再下一城，拎埋洲際盃，當然有壓力，另一邊廂C朗亦有嘢煩，就係逃稅同轉會風波；唔同美斯嘅律師團隊選擇妥協，C朗嘅律師似乎想同西班牙法庭就逃稅案打到底，之前已經列舉C朗以往向西班牙交多咗稅嘅證據。
C朗放空玩冥想
最困擾佢梗係轉會風波，C朗盛傳想返曼聯，但皇馬堅持唔肯平放，索價1.8億鎊（約17.8億港元）轉會費，搞到家陣交易唔上唔落，唔好話踢埋洲際盃，似乎起碼到七月中先有突破性進展。C朗周日就係ig上載張好似冥想緊嘅相，前皇馬球探、現任里爾總監甘保斯就估計，C朗想喺呢幾日冇比賽嘅日子，好好反思吓未來路向。
另外，新季轉投曼城嘅葡軍翼鋒貝拿度施華，佢對新西蘭一戰就射入一球，但之後就傷出，好彩佢係twitter報平安，話自己足踝冇傷，應該可以喺準決賽復出。葡萄牙同智利歷來只交手過三次，葡軍累積兩勝一和，對上一次2011年友賽交手，葡軍主場和1:1。