著名化妝師「Maysum」在facebook發帖指，前日在尖沙咀某大商場如廁，見到一名清潔姐姐聲沙地稱「唔好意思，我好口乾，同唔到你哋每一個人講再見」，她指自己當時「驚訝地又天真地問：『咁仲唔飲水？』」，引述該名清潔姐姐指公司規定工作時不可以飲水，即使帶水在身、收入廁所都不可兼「一發現咗就會掉」。她指聽畢後「好嬲」，質疑是否太不人道，「你要啲阿姐同每一個如廁後嘅人講再見，但講足一日都唔畀飲水！」此po半日已有逾3千人表達憤怒或慘慘表情，立法會議員鄺俊宇亦留言指希望不同崗位的員工都獲尊重，稱有需要可聯絡他。有不少網民估計是海港城，海港城否認事件，稱一向准許清潔員工在廁所內飲水。
「Maysum」又稱，清潔姐姐即使沒有地方要抹，「個身體都要郁，因為企定定的話會畀人話，如果畀人影左相就會投訴去上面」。她強調講出此事「唔係要搏咩」，只希望高層見到此po的話可以檢討事件，不應限制飲水的人權，「將心比己丫，你兩個鐘唔飲水都辛苦啦！何況一個咁努力維持廁所清潔既員工！！！其實，清潔阿姐都係人，都有需要，好應該整個休息室畀佢哋，隔一段時間休息下」。她指自己最後買了一樽水給該名清潔姐姐，「叫佢拿拿林飲左佢快手掉埋佢，阿姐好瘦好瘦……我記得佢講咗句“ 而家搵食好難架」。
她指商場又好，公廁又好，「可唔可以拎返啲人性出來對自己既員工？！」而她亦相信並非一間半間商場的問題，「我見過阿姐食lunch要係廁所食！」其後「Maysum」在fb指會聯絡鄺俊宇跟進事件。
很多網民認同她的說法，雖然她沒有指出是哪個商場，但不少人估計是海港城。海港城昨回覆《蘋果》查詢時表示，有留意此po，稱商場的清潔員很有禮貌，會打招呼及說再見，但否認有限制廁所的清潔員飲水，向有關部門了解過，是容許清潔員在廁所內飲水，不會收起水樽，清潔員可自己帶水，只會提醒清潔員不要帶一些與廁所內清潔用品太相似的樽，以免撈亂，清潔員大約每3至4小時就有20分鐘休息時間，可離開廁所，並設有食飯時間。
網民留言：
Mandy Mt：離地的洗手間管理層！幫你share出去，等多d人學識尊重清潔姐姐！
大文豪：係唔會改善，要上到去影響到班高層利益先改善。要反省既一早反省左，尼班人掩住良知，為的只是個人利益。
Andou Rinae：你要開名、大家先會幫到、呢度係香港、唔係大陸、怕咩野？
Vivian Ho：其實tst大型商場冇幾多間，好易估 係廁所食飯實在太過份
Elaine Ng：海港城啦。我去親廁所如果咁岩見到清潔姐姐，佢地要走出黎親自迎接咁，逐個講「小姐早晨」「小姐再見」。平時我都唔見佢地有水飲，都唔知佢地幾點先有飯食。
Gloria Ho：我係呢個商場樓上返工，已經唔止一次見到啲姐姐要係Toilet食飯，了解過公司係無休息室俾員工食飯，直頭係痴銀線！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk