人民力量快必譚得志同身為立法會議員嘅慢必陳志全,雖然唔係人有相似,但俾人認錯就唔係第一次。好似噚日朝早6點,譚得志聯同香港眾志及社民連等成員,去到灣仔金紫荊廣場趁習近平主席訪港前請願,一齊用幾塊大型黑布圍住金紫荊雕塑,象徵中國一國兩制嘅承諾係謊言,成員期間一度同在場嘅保安人員僵持,快必就幫手隔開警察,分散佢哋嘅注意力,其他人結果順利爬上雕塑掛黑布,抗爭任務大功告成。
唔使講都知,警察一嚟到,就嗱嗱聲拆黑布,點知拆到一半,有個「一柴」嘅警察指住譚得志話:「陳志全呀嘛?」快必鬼馬回應:「係呀,陳志全。」講完連佢自己都忍唔住擰轉面笑呀。之後有另一個警員問佢攞身份證「抄牌」,相信唔會因此再擺多次烏龍嘞啩。
97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk