勞工及福利局局長蕭偉強自今年初接任局長後，副局長冇人頂，常秘又退休，一人頂3份工，仲要處理標準工時、強積金對沖等棘手議題，難怪笑稱「噚日能夠嚟到（茶敍），同大家輕鬆傾偈，真係神蹟嚟」。上任局長後，佢都掛住舊老闆張建宗，形容係「標準長工時嘅老闆」，越多工作越精神，笑言係好難學嘅「高難度危險動作」。
即將卸任局長，亦告別39年公務員生涯，有兩件事啟蒙蕭偉強一生。佢大學畢業後做過香港話劇團演員，21歲入政府做EO，最初分派到音樂事務統籌科，上司係前運輸司蕭炯柱，教曉佢公務員首要廉潔奉公，唔好白𢭃人工，要對社會有影響力。另一宗係80年代油麻地艇戶事件，協助艇戶嘅兩位神父讓佢了解到，同理心好重要，亦要務實，「唔會站喺道德高地」。
先去地中海旅遊充電
仲有幾日退休，蕭偉強遲啲會同家人去地中海、日本旅遊充電，但就唔會重返官場或做全職工作，佢話過完冷河後，會考慮開辦社企或做義工，尤其係復康工作，繼續幫助弱勢社群。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk